मराठी कविता कर मेहनत (Marathi Kavita)

कर मेहनत..…



हरलास काय । फक्त इतक्यात ।
तुझे पाय हात । शेष आहे ।।

खाण्यासाठी अन्न । राहायला घर ।
अनेकांना तर । हेही नाही ।।

दुःख कुणापुढे । मांडत बसून ।
स्वतःला त्रासून । घेऊ नको ।।

समस्येला तोड । नक्कीच असते ।
शोधावे लागते । प्रयत्नाने ।।

सत्कर्माची फळे । उशिरा मिळते ।
त्यागावे लागते । राग लोभ ।।

बसायचे नाही । कधीच रडत ।
कर मेहनत । निरंतर ।।

दुःख नसताना । सुख अर्थहीन ।
फळ कष्टाविन । गोड नाही ।।

सातत्य पाहिजे । आपल्या कामात ।
नको आरामात । दिस घालू ।।

अजू आयुष्याला । नको घालू व्यर्थ ।
टळेल अनर्थ । सत्य वाग ।।


©️®️शब्दसखा – अजय रमेश चव्हाण
तरनोळी
ता.दारव्हा, जि.यवतमाळ
मो.८८०५८३६२०७